Ысык-Көл облусунда 4-октябрь күнү эртең менен Балыкчы — Ананьево — Каракол жолунда Lexus 300 унаасы аласалып кетти. Бул тууралуу «Клооптун» журналистине облустук ИИБдин басма сөз кызматынан билдиришти.
ОИИБдин маалыматына ылайык, жол кырсыгына айдоочунун унааны башкара албай калганы себеп болгон. Натыйжада эки адам каза тапкан.
Бир катар ЖМКлар каза тапкандар экс-депутат жана маркум кримтөбөл Рыспек Акматбаевдин ата-энеси экенин өздүк булактарына таянып кабарлашууда.
Рыспек Акматбаев Кыргызстанда белгилүү кримтөбөлдөрдүн бири болгон. Ал бир нече адамды өлтүрүүгө айыпталып, бирок кийин акталган.
2005-жылы аныкталбаган жагдайда кримтөбөлдүн уулу да каза тапкан. 2005-жылы октябрда Молдовановкадагы түзөтүү абагына барган учурда Акматбаевдин бир тууганы, парламент депутаты Тынычбек Акматбаев киши колдуу болгон.
Ал эми Рыспек Акматбаев өзү 2006-жылы парламентке депутат болуп келген соң бир айдан кийин Көк-Жар айылындагы мечиттин кире беришинде атып өлтүрүлгөн.
