Баткен облусундагы кыргыз-тажик чек арасында үйсүз калган тургундар үчүн 2 гана үй курулуп бүтүп, пайдаланууга берилди. Бул тууралуу 27-декабрда Жогорку Кеңештин Транспорт, коммуникациялар, архитектура жана курулуш комитетинин жыйынында айтылды.
Архитектура, курулуш жана турак жай-коммуналдык чарба агенттигинин директору Нуртазин Жетибаев «Аманат Курулуш Инвест» компаниясы үйлөрдү жаңы жылга чейин курууга жетишпегенин айтты. Анын сөзүндө, мамлекеттик казынадан тийиштүү 1 млрд 400 млн сом бөлүнгөн. Бирок учурда пландалган 400дөн ашуун үйдүн экөө гана пайдаланууга берилди.
Мындан улам депутаттар бир гана курулуш компаниясы тандалып алынганын, ал алган акчасынын 30% боюнча эле отчет бергенин сындашты. Алар келишимди камсыздоо кепилдиги 130 млн сом экенине карабастан 5 млн сом гана которгонун белгилеп, компаниянын жоопкерчилигин кароону сунуш кылышты.
Куралдуу жаңжал
Кыргыз-тажик чек арасындагы ок атышуу 14-сентябрда башталган. Ал эми 16-сентябрда абал курчуп кеткен. Кыргыз бийлиги тажик тарапты «агрессияга жана аскердик кол салууга» айыптады. Ал эми тажик тарап «эскалацияга» Кыргызстанды күнөөлөдү.
Жаңжалда кыргызстандын 63 жараны курман болду — анын 48и аскер кызматкери, 15и жергиликтүүлөр. Ал эми 206 адам ар кандай жаракаттарды алды — алардын 145и жоокерлер, 60ы жай тургундар.
Куралдуу жаңжалда 140 миңге жакын адам үйлөрүн таштап качууга аргасыз болгон. Жаңжалдын кесепетинен жалпы 661 үй жабыркады.
Кыргызстанга келтирилген материалдык чыгымдын суммасы 3 млрд 130 млн сом деп бааланды.
Президент Баткендеги үйлөрдү суук түшкөнгө чейин бүтүрүп берүү тапшырмасын берген. Учурда тургундардын айрымдары үйлөрүнө кайта элек, калгандары чатырларда жана контейнерлерде күн кечирип жатышат.
