Өзбекстанда 25-январда жаңы аба каттамы ачылды: Абу-Даби — Ташкент — Абу-Даби. Бир тарапка билеттин баасы 45 доллардан башталары айтылат «Өзбекстан аэропорттору» сайтынын маалыматында.
Учуулар аптасына үч жолу, Венгриянын WizzAir лоукостеринин учактары менен аткарылып турат.
WizzAir 2022-жылдын декабрынан бери Абу-Дабиден «Самарканд» багыты боюнча аптасына эки жолудан учуп келет.
WizzAir – Венгриянын Airbus үлгүсүндөгү 141 учагы бар лоукостер-авикомпания. Ээлигиндеги учактарынын орто жашы — 5,3 жыл. Лоукостер деп дүйнөдө билеттери арзан жана кошумча кы төлөнгөн кызматтары бар авикомпанияларды аташат.
Кыргыз бийлиги 2020-жылы өлкөгө WizzAir’ди киргизүүнү талкуулап, бирок сүйлөшүүлөр жыйынтык берген эмес. Бирок 2023-жылдын январында парламенттин транспорт боюнча комитети Кыргызстан менен Венгриянын ортосунда түз аба каттамын ачуу боюнча макулдашуунун долбоорун караган.
Макулдашуунун долбоорунда венгер авиакомпаниялары Кыргызстанды учуулардын жана Европа менен Түштүк-Чыгыш Азиянын ортосундагы транзиттин жаңы багыты катары карап жатканы айтылган.
«Учурда кыргыз авиакомпаниялары Евросоюздун "кара тизмесинде" турат, ошондуктан Кыргызстан үчүн Европадан түз учуп турган рейстерди ачуу маанилүү», — деген Мамлекеттик жарандык авиация агенттигинин директорунун орун басары Тимур Аскаров.
