Төрт айдан бери Ысык-Көлдүн түбүн тазалоо иштери жүрүп жатат. ӨКМдин суучулдары бул убакыт аралыгында көлдөн 10 тоннадан ашык таштанды чыгарышты.
Министрликтин 18-июлда жарыяланган видеосунда көлдүн 215 миңге жакын аянты тазаланып бүткөнү айтылат. Ал жерден таштандыдан тышкары 97 миң метрден ашык балык уулоочу тор да чыгарылган.
Маалыматка ылайык, көлдөгү «Ак-Бермет», «Рахат», «Алтын-Көл», «Элинг», «Евразия» эс алуу жайлары жана «Мөлтүр» кеме токтоочу жайынын аймагы тазаланып бүттү.
ӨКМ президент Садыр Жапаровдун тапшырмасы менен көлдүн түбүн март айында тазалап баштаган. Азыркы тапта Чолпон-Ата жана Кара-Ой аймагында тазалоо иштери жүрүп жатат.
Жакында эле Ысык-Көл менен Соң-Көлдө өндүрүштүк максатта балык уулоого убактылуу тыюу салынган. Анда ышкыбоздук жана спорттук балык уулоого, балык өндүрүү боюнча жылдык пландалган иштерди жүргүзүүгө, илимий-изилдөөлөрдү жана балыктардын абалына мониторинг жүргүзүүгө уруксат берилери айтылган.
