18 жаштан өткөн кыргызстандыктар гепатиттин В жана С түрүнө каршы акысыз текшерүүдөн өтө алат. Бул тууралуу 26-июлда Республикалык ден соолукту чыңдоо жана массалык коммуникация борборунан маалымдашты.
Мекемден жарандар текшерүүдөн өтүү үчүн өзү жашаган аймактагы жалпы дарыгерлик практика борборуна же үй-бүлөлүк дарыгерлер тобуна кайрылса болот деп белгилешти.
«В жана С гепатитине жыйынтык терс болуп чыккан 23 жаштан өйдө курактагыларга акысыз эмдөө жасалат. Ал эми гепатит аныкталгандар акысыз дарылануу үчүн каттоодон өтүп, бардык медициналык изилдөөлөрдүн жыйынтыктыгын бериши керек», — деп жазылган билдирүүдө.
Ошондой эле, Республикалык ден соолукту чыңдоо жана массалык коммуникация борбору текшерүүдөн өтүү үчүн атайын даярдыктын кереги жок, болгону кан анализин берүүгө ачкарын баруу керек экенин кошумчалашты.
29-майда Ооруларды алдын алуу жана мамлекеттик санитардык-эпидемиологиялык көзөмөлдөө департаменти 2023-жылдын январь-апрель айларында Кыргызстанда вирустук гепатит оорусун жугузуп алган 1 364 бейтап катталганын билдирген.
Гепатит – боордун сезгенишине алып келген жугуштуу оору. Анын А, В, С, Е жана D түрлөрү бар. А түрү эл арасында сарык деген ат менен тараган. Калган эки формасы кан аркылуу жугат.
Көп учурда өнөкөт вирустук С гепатитинен толугу менен айыгып кетсе болот, дарылоонун узактыгы 3 же 6 айга созулат. Айыгуунун негизги шарты – дарылоонун шарттарын бекем сактап, дарыгердин айткандарын так аткаруу керек.
Өнөкөт В вирустук гепатитинен дарылоо узагыраак болот (бир нече айдан бир нече жылга чейин созулушу ыктымал, балким өмүр бою дарыланууга туура келет).
