Мамлекеттик салык кызматы 2023-жылдын 7-августуна чейин жеке ишкерлерден башка бардык жеке жактардын декларациясын жок кылат. Бул тууралуу Салык кызматынын басма сөз кызматы билдирди.
Маалыматка ылайык, мындай кадам 9-июнда күчүнө кирген «Жеке жактардын активдерин ыктыярдуу легалдаштыруу жана мунапыс берүү жөнүндө» мыйзамдын нормаларына ылайык жасалып жатат.
Жеке жактар тапшырган төмөнкү декларациялар жок кылынат:
- FORM STI-100 (ишкердик иш жүргүзбөгөн жеке жактардын декларациялары);
- FORM STI-103 (жөнөкөйлөтүлгөн салык салынуучу кирешеси жок жеке жактардын декларациялары);
- FORM STI-155 (мамлекеттик жана муниципалдык кызмат ордун ээлеп турган жана ээлеген жеке жактардын декларациялары);
- FORM STI-079 (жеке жак үчүн салык декларациясы).
Салык кызматынан «Жеке жактардын активдерин ыктыярдуу легалдаштыруу» мыйзамынын негизги максаты — кирешелерди легалдуу экономикалык жүгүртүүгө тартуу. Активдерди ыктыярдуу декларациялоонун мөөнөтү – мыйзам күчүнө кирген учурдан тартып кийинки 12 ай.
«Ушул мыйзамдын колдонулушу республиканын экономикасына ички жана тышкы инвестицияларды көбөйтөт, көмүскө экономиканын үлүшүн кыскартат, активдерди ыктыярдуу декларациялоонун киргизилишине чейин орун алышы мүмкүн болгон мыйзамдардын талаптарын бузгандыгы үчүн мамлекеттик органдар тарабынан куугунтуктоодон активдердин сакталышын жана алардын ээлерин коргоону кепилдөөнү камсыз кылат», — деп белгилешти Салык кызматынан.
Активдерди легалдаштыруу жөнүндө мыйзам долбоору
«Жеке жактардын активдерин ыктыярдуу легалдаштыруу жана мунапыс берүү жөнүндөгү» мыйзам долбоорун президенттин администрациясы иштеп чыгып, 2022-жылдын мартында сунуштаган.
Юристтер мыйзам долбоорунун биринчи вариантын сынга алып, демилге өлкөнүн Конституциясына, анын ичинде Кыргызстан өзү мүчө болгон эл аралык келишимдерге жана документтерге, ошондой эле коррупцияны жоюу жана алдын алуу боюнча мамлекеттик стратегияга каршы келерин белгилешкен.
Бирок ага карабастан, парламент президент Садыр Жапаровдун өтүнүчүнөн кийин, 2022- жылдын июнь айында түзөтүүлөр киргизилет деп ишендирип мыйзам долбоорун биринчи окууда кабыл алган. Депутаттар мыйзам долбоорун ушул жылдын 4-майында үчүнчү окууда колдоп беришкен.
Депутат Дастан Бекешевдин айтымында, мыйзам долбоору чын эле кайра иштетилип чыккан, бирок юристтер айткан негизги тобокелдиктер ошол бойдон калган.
Мыйзам долбоору менен кыргызстандыктарга мурда кандайдыр бир себептер менен документке кирбей калган активдерин декларацияга киргизүү сунушталган. Сөз жада калса жеке адамга жана жеке менчикке каршы кылмыштарды жасоо менен алынгандарды кошпогондо мыйзамсыз же кылмыштуу жол менен келген активдер тууралуу болууда. Ал үчүн атайын декларация тапшыруу керек.
Ошол эле кезде активдеринин келген булагын ачыктоого эч ким милдеттүү болбойт. Атайын декларация алардын мыйзамдуу экенине тастыктама болуп берет.
