Жалал-Абад шаарындагы Brosco ресто-барында тургунду сегиз жолу бычак сайган киши кармалды. Бул тууралуу «Клоопко» 8-сентябрда облустук милициядан билдиришти.
Маалыматка ылайык, үстүбүздөгү жылы 7-сентябрга караган түнү саат 01:40та Brosco ресто-барынын алдында 35 жаштагы тургунду өзүнө бейтааныш 18-20 жаштардагы жигит сегиз жолу бычак сайып, денесине жараат келтирген.
Жабырлануучу алган жараатынан улам Жалал-Абад облустук клиникалык ооруканасынын жандандыруу бөлүмүнө түшкөн.
Бул факт боюнча Жалал-Абад ШИИБ тарабынан «Адам өлтүрүүгө аракеттенүү» беренесинин негизинде кылмыш иши козголуп, соттук-медициналык экспертиза дайындалган.
Ыкчам-иликтөө иштеринин натыйжасында, кылмышка шектүү катары Сузак районунун Таш-Булак айылынын 19 жаштагы тургуну кармалып, убактылуу кармоочу жайга киргизилди.
Учурда тергөө амалдары жүрүп жатат.
8-сентябрга карата жабырлануучунун абалы орто экени маалымдалды.
Соцтармактарда кылмыш катталган эс алуучу жай УКМКнын төрагасы Камчыбек Ташиевдин уулу Таймурас Ташиевге тиешелүү экени айтылууда.
ТЕМА БОЮНЧА:
«Министрликтин кызматкери». Бишкекте түнкү клубдун жанында ок чыгарган киши кармалды
Ош: Sky Bar түнкү клубунда мушташка катышкан бажы кызматкерлери иштен алынат
