Кыргыз спортчусу Акназар Кенжебаев шахбокс боюнча дүйнөлүк чемпионатта 90 килограммга чейинки салмак категориясында күч сынашты.
Алгач чейрек финалда түркиялык, жарым финалда франциялык спортчу менен беттешти. Ал эми 2-ноябрда өткөн финалдык беттеште орусиялык атаандашын жеңип, шахбокс боюнча дүйнө чемпиону болду.
Шахбокс боюнча дүйнө чемпионаты 28-октябрдан 2-ноябрга чейин Италиянын Риччоне шаарында өттү.
Шахбокс — бокс менен шахматтын биригүүсүнөн келип чыккан оюн. Рингдин жанына шахмат тактасы да коюлуп, мушкерлер бири-биринин күчү менен катар акылын да сынашат. Оюн жалпы 11 раунддан туруп, анын 5 раундун шахмат ойноп, 6 раунду бокс менен өткөрүшөт.
Шахматта ар бир партияга 4, ал эми ар бир раундга 2 мүнөт берилет. Акырында биринчи болуп мат койгон же нокаутка учураткан мушкер жеңип чыгат. 11 раундда тең жеңүүчү аныкталбай калса, калыстар жеңүүчүнү алардын упайларына карап аныкташат.
