Караколдо мурдагы аялын сабоого шектелген 31 жаштагы тургун бир айга камакка алынды. Бул тууралуу Ысык-Көл облустук ички иштер башкармалыгынан билдиришти.
Милициянын маалыматына ылайык, укук коргоо органдарына арыз менен жабырлануучу өзү кайрылган. Анын айтымында, 18-февраль күнү кечинде мурдагы күйөөсү аны үйүнүн алдынан тосуп алып, ортодо жаралган пикир келишпестиктен кийин ага кол көтөргөн.
Милиция бул фактыны каттоого алып, соттук-медициналык экспертиза дайындаган.
«Текшерүүнүн жүрүшүндө [алар] 2016-жылы баш кошкону, 2019-жылдан баштап [аял] системалуу түрдө зомбулукка кабылып келгени жана буга чейин ал Каракол шаардык ички иштер башкармалыгына жети жолу арыз менен кайрылганы аныкталды», — деп билдиришти милициядан.
31 жаштагы тургунга «Кыйноо» беренеси менен кылмыш иши козголуп, Каракол шаардык сотунун чечими менен бир айга камакка алынды.
Үй-бүлөлүк зомбулук — өлкөдөгү эң олуттуу көйгөйлөрдүн бири. Жыл өткөн сайын үй-бүлөлүк зомбулуктан жабыркагандардын саны өсүүдө. Алардын басымдуу бөлүгү — аялдар.
