«Кыргызстан улуттук электр тармагы» ААКнын кызматкери жетекчилигин компроматты чыгарам деп коркутуп, кызматка дайындоону талап кылган. Учурда шектүү кармалып, тергөө абагына киргизилгенин УКМК кабарлады.
«Шектүү [КУЭТ] жетекчилигине Жогорку Кеңештин депутаттары жана башка жогорку кызмат адамдары аркылуу кысым көрсөтүп, компаниянын филиалдарынын бирине директор кылууну талап кылган. Тергөө амалдары жүрүп жатат», — деп маалымдады УКМК.
«Кыргызстан улуттук электр тармагы» ачык акционердик коому — энергетикалык компания, «Улуттукэнергохолдингдин» «уялашы». КУЭТ электр станциялар иштеп чыккан электр кубатын жогорку чыңалуудагы тармактар аркылуу бүткүл Кыргызстандын аймагындагы таркатуучу компаниялар менен ири өндүрүш колдонуучуларына чейин жеткирет.
КУЭТ 2001-жылы «Кыргызэнерго» акционердик коому кайрадан түзүлгөндөн кийин пайда болгон.
Ошондой эле, КУЭТ Кыргызстандын улуттук энергосистемасы тарабынан борборлоштурулган ыкчам-диспетчердик башкарууну ишке ашырган тутумдук оператор болуп саналат. Компаниянын өлкө боюнча 7 филиалы бар.
