Президенттик администрациянын маалыматтык саясат бөлүмүнүн башчысы болуп Нурай Марс дайындалды. Тиешелүү жарлыкка өлкө башчы Садыр Жапаров кол койду.
2020-жылы октябрь окуяларынан кийин бул кызматты Нургазы Анаркулов жетектеген. Ал 2021-жылдын январь айында УКМКнын Коррупцияга каршы күрөшүү кызматкерлери тарабынан «пара талап кылган» деп шектелип, кармалган.
Анаркулов 1-февралда кызматтан бошотулуп, анын ордуна КТРКнын маалымат-чыгармачылык өндүрүштүк бирикмесинин баяндамачысы жана «Кайдасың?» программасынын алып баруучусу Нуркамал Асканова дайындалган.
Нурай Марс тууралуу
Нурай Марс 1991-жылы 29-сентябрда Бишкек шаарында туулган. 2015-жылы Кыргыз Улуттук университетинин журналистика факултьтетин аяктаган. Учурда Муса Рыскулбеков атындагы Кыргыз экономика университетинин магистратурасында финансы жана кредит факультетинде билим алат.
Марс 2010-2011-жылдары Бишкек шаардык мэриясынын коомчулук менен байланыш бөлүмүнүн адиси, 2013-жылы өкмөттүн жергиликтүү өзүн-өзү башкаруу жана этностор аралык мамилелер мамлекеттик агенттигинин басма сөз катчысы, 2014-2015-жылдары Бишкек шаардык мэриясынын коомчулук менен байланыш башкармалыгынын жетекчисинин милдетин аткаруучу, 2017-жылдан 2021-жылга чейин Улуттук банктын коомчулук менен байланыш бөлүмүнүн башкы адиси болуп иштеген.
