Ош облусунун Алай районунун акими Каныбек Апбасов карыялар күнүндө 103 жаштагы ветеран Суранбай Алиевге анын УКМКнын төрагасы Камчыбек Ташиев менен түшкөн сүрөтүн белек кылды. Ошондой эле карыяга 5 миң сом акча берилди.
«Турмуш» басылмасы жазгандай, карыялар күнүн белгилөө үчүн жергиликтүү бийлик аларды ресторанга чогулткан. Аларга иш-чара концерттик программа менен коштолду.
«Карыларыбыз карыса да, алардын сөзү карыбайт. Алардын нуска, накыл сөздөрү биз үчүн табылгыс», — деп куттуктады аким.
Беш күн мурда, УКМКнын Алайдагы жаңы имаратынын ачылышында райондун акими Ташиевге «Алай районунун ардактуу атуулу» наамын ыйгарган. Ал «наам берүү чечими 2008-жылы эле кабыл алынып, бирок аткарылбай калган» деп ишендирген.
Расмий маалымат боюнча, Кыргызстанда пенсия жашындагы кишилер 2020-жылдын 1-декабрына карата 687 миң 154тү түзгөн.
