АКШнын Эл аралык өнүктүрүү боюнча агенттиги (USAID) өлкөнүн үч ооруканасына заманбап медициналык жабдууларды тапшырды. Бул тууралуу 16-августта USAID’ден билдиришти.
Маалыматка караганда, мындай колдоо COVID-19 менен күрөшүү үчүн көрсөтүлгөн. Анын алкагында Улуттук госпиталга жогорку технологиядагы мобилдүү видеобронхоскоп тапшырылган.
Ал эми Чүй облустук ооруканасына чектелген шарттарда диагностика жүргүзүүгө мүмкүнчүлүк берген мобилдик рентген-аппарат берилген. Ош шаардык ооруканасына болсо шейшептерди жана бейтаптардын буюм-тайымдарын дезинфекциялоо үчүн атайын камералар алынган.
Медициналык жабдуулардын жалпы баасы 15 млн сомду түзгөн.
USAID коронавирус пандемиясы башталгандан бери Кыргызстанга 10 млн доллардан ашык жардам көрсөткөн — бул каражаттар жеке коргонуу каражаттарын сатып алууга, лабораторияларды жаңылоого жана башкаларга жумшалганы айтылган.
Кыргызстанда 8-августтан 14-августка чейин 527 адамдан коронавирус аныкталды. Илдетке чалдыккан 138 бейтап ооруканада, калгандары үйүндө дарыланып жатат. Ал эми пандемия башталгандан бери коронавирустан жалпы үч миңдей адам каза болду.
