Кыргызстандык спортчу Ынтымак Мурадил уулу Түркияда өтүп жаткан Ислам шериктештиги оюндарында салттуу жаа атуу боюнча алтын медаль утту.
Бул аталган оюнда Кыргызстандык спортчулар багындырган сегизинчи алтын медаль болду. Жалпысынан өлкөнүн куржунунда 26 медаль бар — анын сегизи алтын, алтысы күмүш, 12си коло.
Ислам шериктештиги оюндарынын расмий ачылышы 9-августта Түркиянын Конья шаарында өткөн.
Оюндун ачылышында Кыргызстандын желегин балбан Атабек Азизов жана жеңил атлетчи Айнуска Калил кызы көтөрүп чыккан.
Чемпионат 18-августка чейин созулат. Ага дүйнөнүн 56 өлкөсүнөн төрт миңге жакын спортчу катышып, спорттун 20 түрү боюнча 483 комплект медаль ойнотулуп жатат. Мелдешке 25 кыргыз спортчусу катышууда.
