![](https://ky.kloop.asia/wp-content/uploads/sites/6/2023/01/327804928_903308794434084_5572113701095579094_n.jpg)
Талас районуна 26-январда суу каптоо коркунучунан улам киргизилген өзгөчө кырдаал режими алынды. Бул тууралуу ӨКМДен билдиришти.
Маалыматка караганда, Көпүрө-Базар айылындагы суунун жалпы 2500 метр узундуктагы нугу тазаланган. Суу каптоо коркунучу толугу менен жоюлуп, Жарандык коргонуу комиссиясынын чечими менен өзгөчө кырдаал режими алынган.
Буга чейин Көпүрө-Базар айылынан агып өткөн Кара-Кол дарыясы тоңуп, жээкке жакын жайгашкан үйлөрдү жана короо-жайларды каптоо коркунучу жаралган.
Тоңгон музду тазалоо үчүн жол тазалоо ишканасынан 10 жумушчу, 2 техника жана райондук өзгөчө кырдаалдар бөлүмүнүн кызматкерлери тартылган.
Ошондой эле «Кызыл ай» коомунун Талас облусундагы өкүлчүлүгү колдоо көрсөтүү максатында кызматкерлерге 3 күндүк ысык тамак камсыздаган.