Бишкектеги «Кудайберген» базарына жакын жердеги Лумумба жана Профсоюзная көчөлөрүнүн кесилишинде жайгашкан унаа тетиктерин саткан дүкөндө өрт чыкты. Бул тууралуу ӨКМден билдиришти.
Мекеменин маалыматына ылайык, түнкү саат 2:19да башталган өрттү өчүрүүгө 13 өрт өчүрүү тобу тартылган.
«Бактыга жараша, адам өмүрүнө коркунуч жаралган эмес, жабыркагандар жок», — деп билдиришти ӨКМден.
Өрт таңкы саат 6да чектөөгө алынып, 9:08ге карата толук өчүрүлдү. Болжолдуу маалыматтарга караганда, өрт жайылган аянт 3 миң чарчы метрди түздү. Дүкөндөн тышкары ага жанаша жайгашкан жеңил контейнерлер да күйүп кеткен.
