Парламенттин мурдагы депутаты жана коомдук ишмер Жылдызкан Жолдошева саясатчылардын, журналисттердин жана активисттердин камалышы боюнча президент Садыр Жапаровго кайрылды.
Жолдошева KG Group курулуш компаниясынын негиздөөчүсү Имамидин Ташов менен «Социал-демократтар» партиясынын лидери Темирлан Султанбековдун иштерин белгиледи. Азыр экөө тең ТИЗОдо камакта отурат.
Экс-депутат мамлекет башчы да кезинде камалып, өз жанын кыюуга аракет кылганын эске салып, азыр болсо үч жолу өз өмүрүнө кол салууга аракет кылган ишкер Ташов да муну башынан өткөрүп жатканын билдирди
«Садыр иним, сен капа болбо бир чындыкты айтсам. Эгерде биз сени колдоп турбаганда, ар бир сотуңа барып, ММК аркылуу кайра-кайра сен жөнүндө айтып турбаганда, сага да Имамидиндей өтө оор болмок...бул ачуу чындык. Имамидиндин артында азыр жалгыз апасы жүрөт, көзүнүн жашын көл кылып», — деди Жолдошева.
Ал ошондой эле бийлик өкүлдөрүнүн эч кимиси Темирлан Султанбековдун 32 күндөн бери ачкачылык кармап жатканына реакция кылбаганына тынчсыздануусун билдирип, анын өмүрү коркунучта экенин белгиледи.
Жолдошева Жапаровдун эмнеге күнөөсүз саясатчыларды, журналисттерди жана активисттерди камакка алып, бирок мамлекетке зыян келтирген экс-чиновниктерди «кечирип» жатканын түшүнбөй турганын билдирди.
«[Эмне себептен] 30 млрд сомдон ашуун коррупцияга жол берген Акылбек Жапаровду кечээкидей кол чабуу менен узатып, ал эми чындыкты, же өз оюн жазгандарды эркинен ажыратып жатасыңар?», — деп суроо салды Жолдошева.
Анын пикиринде, Акылбек Жапаровду жана башкаларды кечиргенден кийин бийликтин саясий «мотив» менен камалган жарандарды түрмөдө камоого мындан ары моралдык укугу жок.
«Түшүнөм "абсалюттук бийликке" ээ болгон адам баласы, кимиси болбосун өзүн Кудай сезмек турсун, Кудайдан да өзүн жогору коюп алат... жараткандын каарына калбаш керек. Биз болгону жөнөкөй эле пенде экенибизди унутпасак. Эртең эле, эгерде Кудай буйруса... бизге окшогон эле пенде бойдон эл арасында жүрүп каласың. Жараткан ошону сага буйрусун», — деди ал.
Жылдызкан Жолдошева 2010-жылы Садыр Жапаров жана УКМКнын азыркы башчысы Камчыбек Ташиев менен бирге «Ата-Журт» партиясынан парламент депутаты болгон.
Жапаров камалганда Жолдошева аны бошотуу талабы менен митингдерге чыккан. Жыйынтыгы жокко чыгарылган 2020-жылдын октябрындагы парламенттик шайлоодо ал «Мекенчил» партиясынын тизмесинде төртүнчү болгон. Анда партиянын лидери катары Ташиев менен Жапаров көрсөтүлгөн.
