Кыргызстан 2015-жылдын май айынынын башында Бажы жана Евразиялык экономикалык биримдиктердин толук кандуу мүчөсү болуп калат, деп билдирди президент Алмазбек Атамбаев. Ал 23-декабрда өлкөнүн аталган биримдиктерге кошулуусу боюнча келишимге кол койду.
Президент Алмазбек Атамбаев Бажы жана Евразиялык экономикалык биримдиктерге кошулуу тууралуу келишимге 23-декабрь күнү Москвада, Жогорку Евразиялык экономикалык кеңештин жыйынынын жүрүшүндө кол койгон.
Жогорку Евразиялык экономикалык кеңеш — евразиялык интеграциянын жогорку органы. Орусия, Казакстан жана Белоруссиянын Бажы биримдигинин базасында негизделген Евразиялык экономикалык биримдик 2015-жылдын 1-январынан тарта иштеп баштайт.
Тема боюнча: Хроника: Кыргызстандын Евразиялык экономикалык биримдикке кошулуусу тууралуу келишимге кол коюу
Бажы биримдигине мүчө үч өлкөдөн сырткары евразиялык интеграцияга Армения да кирет.
Атамбаевдин айтымында, Кыргызстан Евразиялык экономикалык биримдикке 2015-жылдын май айынын башталышына карата кирет.
«Кыргызстан кийинки жылдын 9-майына, Улуу Ата Мекендик согуштун жеңишинин мааракесине карата Евразиялык экономикалык биримдиктин толук кандуу мүчөсү болот деген үмүттөмүн. […] Мен 1-майга чейин Кыргызстандын алдына коюлган бардык маселелерди аткарып, сөзүбүзгө турабыз деп ойлойм. Жумуштардын бардыгын аткарабыз», — деп билдирди Атамбаев.
Кыргызстандын президенти кол коюлган келишимде өлкөнүн Евразиялык экономикалык биримдикке киришинин көрсөткүчтөрү аныкталгандыгын белгиледи.
«Кол коюлган келишимде Кыргызстандын кошулуусунун [Бажы биримдигине] көрсөткүчтөрү ачык жана адилеттүү аныкталган, үлүштүк бөлүктөрүн бөлүштүрүү, Бирдиктүү бажы тарифтери, келишимдин күчүнө кирүү мөөнөттөрү, бажы тарифтерин пайдалануу жана кыргыз-казак чек арасындагы бажы көзөмөлдөрүн жоюу даталары аныкталган», — деп кошумчалады Алмазбек Атамбаев.
Экономика министри Темир Сариев билдиргендей, Евразиялык экономикалык биримдиктин жетекчилигинен Кыргызстанга үч орун бөлүп беришкен.
Ал өлкө Бажы биримдигинин бардык кирешелеринин 1,9 пайызын ала тургандыгын кошумчалады. Казакстандын Бажы биримдигиндеги үлүшү — 7 пайыз, Белоруссияныкы — 4,7 пайыз, Арменияныкы — 1,3 пайыз.
Сариев Орусиянын үлүшүнүн көлөмү тууралуу айткан жок.
Сүрөт: Султан Досалиев.
