Денис Петрашов сууда сүзүү боюнча CIG Challenge эл аралык турниринде күмүш медаль утуп алды. Аталган турнир Швейцариянын Женева шаарында өткөн.
Ал күмүш медалды 200 метрлик аралыкты 2 мүнөт 15 секундда сүзүп өткөндүгү үчүн алган. Петрашов мындан тышкары 100 жана 50 метрлик аралыктарда да күч сынашып, төртүнчү жана жетинчи орундарды алган.
Петрашов 2020-жылы Токиодо өтө турган Олимпиада оюндарына катышып, 100 жана 200 метрлик аралыктарда брасс стили боюнча күч сынашат. Ал 2016-жылы Рио-де-Жанейродо болуп өткөн Олимпиада оюндарына катышкан.
2020 жайкы Олимпиада оюндары 2020-жылдын 24-июлунда Токиодо башталат. Ал оюндарга Денис Петрашовдон тышкары башка кыргыз спортчулары да катышат: балбан Айсулуу Тыныбекова, жеңил атлетчи Дарья Маслова, балбан Атабек Азизбеков жана жөө күлүк Юлия Андреева.
