Саламаттык сактоо министрлигинин башкы акушер-гинекологу Раиса Асылбашева маркум жети айлык кош бойлуу кезинде ооруканага түшкөнүн «Клоопко» билдирди.
«Ал вирустун көрүнүштөрү менен түшкөн, төрөткө операция жолу менен уруксат берилип, эки ымыркай ара төрөлүп, азыр экөө багып өстүрүүнүн экинчи баскычында болууда», — деди Асылбашева.
Ошондой эле Асылбашева ПЧР-тесттин экөөсү келинде коронавирустун терс жыйынтыгын көрсөткөнү менен ал кайтыш болоор алдында тапшырган үчүнчү тест оң болуп чыкканын кошумчалады.
«Операциядан кийин анда пневмония өөрчүп кетти. Биз аны аман алып кала албадык. Ал бешинчи суткада өпкө жетишсиздигинен улам каза тапты», — деп айтып берди Асылбашева 24.kg маалымат агенттигине.
Саламаттык сактоо министрлигинин маалыматы боюнча, №2 Клиникалык төрөт үйүндө COVID-19 диагнозу тастыкталган 27 жаштагы аял кайтыш болгон. Келиндин кайтыш болгону тууралуу маалымат 30-июндун статистикасына кошулду.
Кыргызстанда пандемия башталгандан бери COVID-19га чалдыккан 57 бейтап вирустка моюн сунду.
30-июнга карата республика боюнча коронавирус жуктуруунун 5 296 учуру катталды. 2 370 айыгып стационарлардан чыгарылган, 721 бейтап учурда дарыланууда.
