Орусиялык теле алып баруучу Артур Цветков кыргыз теле алып баруучусу Ассоль Молдокматовадан 1 млн доллар кун өндүрүүнү көздөп жатат. Анын айтымында, Молдокматова соцтармактарда кыргызстандыкка кол салгандыгы үчүн кыргыз коомчулугун ага каршы «тукуруп», эми күн сайын коркутууларды алууда.
«Мен ачык төгүнгө чыгарууну жана моралдык зыян үчүн 1 млн доллар өлчөмүндө компенсация талап кылам. [...] Аял түшүнүп туруп эле боорукер кыргыз элинин бир бөлүгүн мага тукуруп, биз өз алдынча чечишип алган чырды башкача кылып айтып берген. Эми мен күн сайын таңды өлүмүмдү тилеген билдирүүлөр менен тосуп жатам», — деп билдирди Цветков.
Анын айтымында, Молдокматова соцтармактарда «улуттар аралык жаңжалды козутуу» менен мыйзам бузууда.
«Мен жаштар менен жигердүү кызматташам жана үлгү болуп, адилетсиздик үчүн күрөштү милдетим деп эсептейм. Ошондуктан бул ишти адискөй юристтерге тапшыруудамын жана алар менен бирге мыйзамдуулуктун сакталышын жана коом алдындагы аракеттери менен чакырыктары үчүн жоопкерчилик тарта билүү керектигин жактайм», — деди Цветков.
Ассоль Молдокматова да Кыргызстанда ыктыярчылык иш кылган белгилүү теле алып баруучу. Буга чейин соцтармактарда Молдокматова 11-августта Москванын тез-татым жайларынын биринде чуу чыгарган Цветковдун аракеттерине нааразы болгон.
«Биз — кыргыз эли — ынтымактуу жана биримдиктүү элбиз, кыргызстандыктарды таарынтканга жол бербейбиз. Эгер сиз теле алып баруучу болуп туруп өзүңүздү тектүү москвалык деп төш кагып жатсаңыз, анда, алгач, чыныгы москвалыктар айырмаланып турган этика жана маданиятты үйрөнүп алыңыз. Эгер бул иште жеке өзүңүздө маселе бар болсо, анда биз үйрөтө алабыз», — деп жазган Молдокматова.
Молдокматова да Кыргызстандын ТИМине кайрылып, Цветковдун аракеттерине көңүл бурууну суранып, аны «улутчул» деп атаган.
«Бул Артур Цветковдун жана кыргызстандыктын жаңжалы эмес, бул баарынан да толерантсыздыгын көрсөтүп аткан улутчулдун жаңжалы. Ошондуктан чымырканып туруп, бүгүн бул чырга чекит коюуга аракет кылгыла», — деп жазган Молдокматова.
Окуя болгон учурда тартылган видеодон Цветков ал жерде иштеген кыргызстандык Манап аттуу баланы сөгүп атканын көрүүгө болот. Ал ага беткапты туура эмес тагып алганын айтып эскерткени үчүн кол көтөрүп, депортация кылам деп коркуткан.
Видео чыккандан кийин Молдокматова жана башка көптөгөн Кыргызстандын белгилүү адамдары Цветковду эл алдында кечирим суроого чакырып, Манапты колдоого алышкан.
Окуяга Цветков иштеп кеткен MTV Россия телеканалынын жетекчиси Яна Чурикова да комментарий берген. Ал дагы Цветковдон кечирим суроосун талап кылып, анын жоругун «орунсуз» деп атаган.
Кыргызстандык соцтармактын колдонуучулары да нааразылыктарын айтышкан. Көбүнесе алар Цветковдун соцтармактагы постторунун алдына сөгүп-саккан пикирлерин калтырышкан.
Ал эми Цветков өзү кафенин кызматкери менен элдешкенин кабарлаган. Цветков менен Манап бири-биринен кечирим сураган жолугушууга алып баруучунун адвокаты, Кыргызстандын Орусиядагы элчилигинин өкүлү, элчиликтин алдындагы миграция боюнча бөлүмүнүн кызматкерлери жана Мигранттарды колдоо фондунун өкүлдөрү да катышкан.
Материалдын үстүндө иштегендер: Милана Щербакова жана Амина Кадралиева.
ТЕМА БОЮНЧА:
Москвада кыргыз мигрантын ашата сөккөн алып баруучу кечирим сурап, тараптар жарашты
«Депортациялаймын». Москвада теле алып баруучу кыргыз мигрантын ашата сөктү
