Жогорку Кеңештин депутаты Алмазбек Акматов 56 жашында каза болду. Бул тууралуу «Бир Бол» саясий партиясы билдирди.
«Кесипкөй адистен, ишенимдүү достон, салмактуу саясатчыдан айрылган кесиптештери Алмазбек Акматовдун үй-бүлөсүнө жана жакындарына терең кайгыруу менен көңүл айтабыз», — деп жазылат билдирүүдө.
Акматов 1964-жылы 18-октябрда Нарын облусунда туулган. Маркум эмгек жолун 1982-жылы СССРдин куралдуу күчтөрүндө баштап, 1992-жылы «Торугарт-Транзит» кыргыз-кытай ЖЧКсын жетектеген. Ал эми 2001-2007-жылдары ал Мергенчилик ресурстарды көзөмөлдөө башкармалыгы, жаратылышты коргоо фонду жана президенттик аппаратта иштеген.
2007-2012-жылдары Акматов Эсептөө палатасынын Бишкек шаары, Чүй жана Талас облустары боюнча аймактык бөлүмүнүн жетекчиси болгон. Кийинчерээк, 2015-жылы өткөн парламенттик шайлоодо ал «Бир Бол» партиясынан Жогорку Кеңешке депутат болуп келген.
Ал эми 2020-жылы өткөн парламенттик шайлоодо ал «Замандаш» партиясынын тизмесинде 13чү орунда болгон. Акматовдун артында аялы жана беш баласы калды.
