Бишкектин Ленин райондук ички иштер башкармалыгынын кызматкерлери «Киши өлтүрүүгө» шектеп эки селсаякты кармады. Бул тууралуу Ленин РИИБнин басма сөз кызматы кабарлады.
Маалыматка ылайык, 1-мартта Чуйков көчөсүндө жайгашкан үйлөрдүн биринин жанында белгисиз адамдын сөөгү табылып, ал жерге милиция кызматкерлери жөнөтүлгөн.
«Соттук-медициналык эксперттер менен биргеликте жүргүзүлгөн сырткы кароо учурунда маркумдун башында жана чекесинде жаракат аныкталган», — деп берилет Ленин РИИБнин билдирүүсүндө.
Бул окуя боюнча Биринчи май РИИБи «Киши өлтүрүү» беренеси менен сотко чейинки өндүрүштү баштаган. Ал эми шектүүлөр Ленин РИИБнин «Селсаяк» аталыштагы рейди учурунда колго түшкөн — алар 34 жана 26 жашта.
Учурда эки шектүү Биринчи май РИИБнин убактылуу кармоочу жайына киргизилди.
