Экс-депутат Алишер Мамасалиев көз жумду — ал болгону 48 жашта болчу. ЖМКлар Мамасалиевдин жакындарына таянып, ал ооруп жүргөнүн билдиришти — маалым болгондой, ал Германияда дарыланып жаткан.
Мамасалиев саясатчы катары эле белгилүү болгон эмес — ал билими боюнча юрист, учурунда журналист да болгон. Журналисттик карьерасынын башында «Замана» студиясынын алып баруучусу болгон. Андан соң Бишкек мэриясынын басма сөз кызматында иштеген.
Саясатка 2007-жылы келип, Кыргызстандын тактан кулатылган экинчи президенти Курманбек Бакиевдин маалында бийликчил «Ак-Жол» партиясынын жаштар канатына кирген. Кийинчерээк ушул эле партиянын курамында парламентке өтүп, депутат болгон. Бакиев өлкөдөн качкандан кийин партия жоюлуп кеткен.
Мамасалиев коомдук ишмердүүлүгү менен дагы таанымал болчу. Мындан тышкары, ал өзүн жазуучулукта дагы сынап жүргөн.
