Ош облусунун Араван районунда ири суммада акча опузалоого шектелип жергиликтүү кеңештин депутаты жана анын шериги кармалды. Бул тууралуу Ош ОИИБнин басма сөз кызматы билдирди.
«Тергөө иш-чараларынын натыйжасында милиция тарабынан 57 жаштагы тургундан 3 миң доллар алып жаткан жеринен А.С. аттуу жаран жана анын Кесек айылында жашаган 28 жаштагы кылмыштуу шериги Ж.Ж. кармалды. Алар Кара-Суу РИИБдин убактылуу кармоочу жайына киргизилди», — деп билдиришти Ош ОИИБдин басма сөз кызматы.
Мангыт айыл өкмөтүнөн «Турмуш» басылмасына А.С. 2021-жылдын 11-апрелинде өткөн шайлоонун жыйынтыгы менен айылдык кеңешке депутат болуп шайланганын, жакында эле мандатын алганын айтып беришкен.
Жаңы шайланган депутаттын бөгөт чарасы 1-июнда кабыл алынары айтылды. Анын шериги 31-майда Ош шаардык сотунун чечими менен үй камагына чыккан.
Материалды даярдагандар: Нурсултан Үсөнов жана Бегимай Арстанбекова.
