Жалал-Абад облусунун Аксы районундагы Ак-Жол айылында сел агызып кеткен эки жарым жаштагы Фатиманын сөөгү табылды. Бул тууралуу Жалал-Абад ОИИБден билдиришти.
Маалыматка ылайык, наристени үйүнө жакын жерден атасы Нурбек Шайыбеков тапкан.
Ал селдин кесепетинен апасын, кыздарын, карындашын, жээндерин жоготту. Алардын баары Алты-Айры жайлоосунда чатырда набыт болушкан. Ошондой эле жамгырдан коргонуу үчүн алардын чатырына кирип турган 5 жаштагы бала каза тапты.
Шайымбетов жакындары жайлоого ошол күнү гана кеткенин белгилеп, мындай сел «100 жылда да болбогонун» айтып кейиди.
12-июлда катуу жааган жаандан улам Аксынын Жаңы-Жол, Ак-Жол айыл аймактарында сел жүргөн. Ал жалпысынан сегиз кишинин өмүрүн алды. Учурда Таштак айылында сел агызган беш жашар баланын сөөгү изделип жатат.
Селдин кесепетинен улам Ак-Жол жана Жаңы-Жол айыл аймактарында Өзгөчө кырдаал режими жарыяланды. Буга чейин Өзгөчө кырдаал режими Баткен районунун бир нече айылында жарыяланган. Анда сел 47 турак үйдү кооптуу абалга келтирип, эки көпүрөнү агызып кеткен.
