Кыргызстандын Түштүк Кореядагы мурдагы элчиси Динара Кемелова тышкы иштер министринин орун басары болуп дайындалды. Бул тууралуу ТИМдин басма сөз кызматы 7-мартта кабарлады.
Кемелова буга чейин да ТИМ башчысынын орун басары, биринчи орун басары кызматтарын аркалаган. Мындан сырткары, ал Кыргызстандын Кытай жана Жапониядагы элчиликтеринде иштеген.
Бир катар ЖМКлар Кыргызстандын Жапониядагы экс-элчиси Рысбек Молдогазиев Кемелованын күйөөсү экенин жазып чыгышкан. Молдогазиев бул кызматта 2011-2015-жылдары иштеген. Ал эми Молдогазиевдин элчилик кызматка дайындалышы дипломаттардын «этикалык кодексине туура келбегени» айтылган. Анткени ошол учурда Кемелова министрдин орун басары болгон.
Ал эми 2019-жылдын январь айында Кемелова Кыргызстандын Түштүк Кореядагы элчиси болуп дайындалган. 2021-жылы ал Түштүк Корея менен бирге Вьетнамда да элчи болуп турган.
Президент Садыр Жапаров 16-февралда Кемелованы элчилик кызматтан бошотуп, анын ордуна экс-вице-премьер-министр Аида Исмаилованы дайындаган.
