Министрлер кабинетинин төрагасынын орун басары Эдил Байсалов «Адилет» укуктук клиникасынын башчысы Чолпон Жакупованы жана активист Атай Бейшенбекти сынга алды.
Жакупова Фейсбук барагына Чолпон-Ата шаарындагы «Рух Ордо» комплексинде Жапаровду салтанаттуу тосуп алышканы тууралуу видео жүктөгөн. Жакупова аземди «кемсинтүүчү кулчулук» деп атап, минкабдын төрагасын «заманбап жетекчи» катары мындай көрүнүшкө тыюу салууга чакырган.
«Кыргыздар, эл-журт! Мунун эмне кереги бар?! Өзүбүз эле ар кандай акылдууну жиндиге айлантып алабыз го! Мунун баарына карап туруу уят го… Акылбек Жапаров, мындай нерселерге алданбаңыз, сураныч», — деп жазган ал.
Бирок Акылбек Жапаровдун орун басары Эдил Байсалов Жапаровду Фейсбук барагында коргоп чыкты. Талкууга алынган иш-чарага Байсалов өзү да катышканы белгилүү болду.
«Эки күн Чолпон-Атада туризмге арналган бир канча иш-чара өттү. Азыр Фейсбукту ачсам, баягылар эле ичи тарлык, көрө албастыктарын улантышып, "хан кылып тосупсуңар, андай кылбагыла" деп акыл үйрөтүшүптүр. Эл-журт, мобул Атай Бейшенбек (активист), Чолпон Жакупова жана баягылар өмүрүндө эмне көрүшкөн, эмнени билишет?», — деп жазды Байсалов.
Ал ошол күнү «Рух Ордо» комплексине он чактыдай элчи, бир канча алыскы жана жакынкы мамлекеттен расмий жана ири бизнестин өкүлдөрү, республиканын булуң-бурчунан туризм менен алектенген жүздөгөн адистер, борбордон жана өрөөндөн жооптуу кызматкерлер, короо толо журналисттер чогулушканын белгиледи. Анын айтымында, бул күнү туризм сезону ачылган.
Байсалов видеого тартылган иш-чара катышуучуларга жергиликтүү маданиятты көрсөтүү максатында уюштурулганын белгиледи. Мындан тышкары минкабдын төрагасынын орун басарынын айтымында, буга окшогон театрлаштырылган майрамдар дүйнө жүзүндө өткөрүлүп келет, ал эми майрамды тескери бурмалап, кошоматтыкка айланткандары — бул «түркөйлүк жана кадимки көрө албастык».
«Мен дагы катураак айтат элем. "Эмоцияга алдырба" деп атышат. Өмүрүндө эч нерсе көрүп-билбегендерди укпагыла. Мамлекет эмне экенин, “М” тамгасын да билишпейт. Анан ышкыргандары таш жарат дейсиң», — деп жыйынтыктаган ал сөзүн.
Дагы окуңуз: Эдил Байсалов: Эки Жапаровдун ден соолугун тилеңиздер, карасанатайларды укпаңыздар
