Ысык-Көлдөгү «Радуга» эс алуу борборунда эркек киши балдарынын көзүнчө аялын сабады. Окуянын видеосу black_list.kg телеграм-каналында жарыяланды.
Күбөлөрдүн айтымында, сабалган аял жаракатынан улам жеринде эс-учун жоготкон.
«Катуу кыйкырык чыкканынан барып, окуяны дароо видеого тарта баштадым. Мени таң калдырганы — бир аял (ким экенин билбейм, бирок тууганы окшойт) келип, эч кимге айтпагыла деп аны алып кете баштады», — деп билдирди күбөлөрдүн бири.
Ысык-Көл облустук ички иштер башкармалыгынан «Клоопко» аталган факт маалымат журналына катталганын билдиришти. Иштин чоо-жайын аныктоо үчүн жерине милиционерлер барган.
Бирок ОИИБден аял арыз жазуудан баш тартканын айтышты.
Үй-бүлөлүк зомбулук жана фемицид
Кыргызстан дүйнөдөгү аялдардын бакубаттыгы жана коопсуздугу боюнча глобалдык индексте (WPS Index) Борбор Азия өлкөлөрүнүн ичинен эң кооптуу өлкө деп саналат. Аталган индексте Кыргызстан аялдардын абалы бааланган 170 өлкөнүн ичинен 97-орунду ээлеген.
Ошондой эле, Amnesty International 2021-жылы Кыргызстанда үй-бүлөлүк зомбулук «кең мүнөздүү» болгонун белгилеген. Уюмдун баяндамасында, жабыркагандар кол салгандардан экономикалык жактан көз каранды болгондуктан жана кепке калуудан корккондуктан милицияга көп деле кайрылбаганы айтылган.
Кыргыз ИИМинин маалыматына караганда, өткөн жылы 10 миңден ашык үй-бүлөлүк зордук-зомбулук фактысы катталган.
Зордукчуну реалдуу мөөнөткө соттотуу абдан кыйын — кылмыш иштеринин көбү административдик жоопкерчилик катары каралып калат, ал жерде күнөөкөр адам айып пул төлөп же административдик иштерге тартылып жазадан кутулуп кете алат. Ошол эле кезде жазага тартылбасын билип, үй-бүлөдө зомбулугун уланта берет.
Дайыма болуп турган үй-бүлөлүк зомбулук аялдардын күйөөлөрү, жарандык никедеги чогу жашаган адамдары же мурдагы өнөктөштөрү тарабынан өлтүрүлүшүнө алып келет. Адам өлтүрүүнүн бул түрү фемицид деп аталат.
Сиз же сиздин жакындарыңыз зордук-зомбулукка кабылган учурда төмөнкү кризистик борборлорго кайрылсаңыз болот.
Кризисттик борборлордун даректери:
«Шанс» кризистик борбору: Бишкек, Чүй проспектиси 207, 509-кабинет - 0709 710 320;
«Сезим» кризистик борбору — Бишкек, Табышалиев көчөсү 3 - 0312512640
«Энсан — Диамонд» коомдук уюму — Ош, Ленин көчөсү 205/105 - 0772328960
«Акылкарачач» кризистик борбору — Ош обл. Гүлчө айылы - 0555281423
«Аруулан» кризистик борбору — Ош, Ленин көчөсү 205 - 0776380777
«Ак жүрөк» кризистик борбору: Ош, Ленин көчөсү 205 - 0 550 231 329, 0 322 245 976
«Мээрбан» кризистик борбору — Ош, Ленин көчөсү 312/23 0773843461
«Тендеш» кризистик борбору — Нарын, Кыргыз көчөсү 31/3 0700257890
«Маана» кризистик борбору — Талас, Тагайбаев көчөсү 274/2 0557484713
«Жаныл Мырза» кризистик борбору — Баткен, Сыдыков көчөсү 3 0777393077
«Каниет» кризистик борбору — Жалал-Абад, Б. Осмонов көчөсү 113 0372255084
«Аялзат — аялдардын демилгесин колдоо» коомдук уюму: Каракол, Абдрахманов көчөсү 105-14 - 0392 251 091, 0553 835 717;
«Алтынай» кризистик борбору — Чолпон-Ата шаары - 0709 694 550
«Мээрман» кризистик борбору — Каракол шаары - 0706 383 637
«Химая» аялдарга жардам берүү жана реабилитациялоо борбору: Каракол - 0702 223 535 — түз байланыш номери - 0551 733 390.
Тема боюнча окуңуз: «Аны баары бир өлтүрмөкмүн». Кыргызстандагы фемицид тууралуу «Клооптун» изилдөөсү
«Сен эч нерсеге татыбайсың!». Зомбулукка кабылган кыргызстандык үч майып аялдын окуясы
