Балбан Айсулуу Тыныбекова Египетте өтүп жаткан Ibrahim Moustafa эл аралык мелдешинде алтын медаль багындырды. Бул тууралуу Бириккен күрөш дүйнөсүнөн кабарлашты.
Тыныбекова рейтингдик мелдеште кыз-келиндер күрөшү боюнча 62 килограмм салмактык категорияда күч сынашты. Ал финалдык беттешке чейин Франция, АКШ жана Украинадан келген спортчуларды жеңди.
Ал эми финалда кытайлык атаандашын 3:2 эсебинде утуп, алтын медалга ээ болду.
Мелдеш Египеттин Александрия шаарында өтүп жатат. Анда спортчулар грек-рим, эркин жана кыз-келиндер күрөшү боюнча ат салышууда.
Тыныбековага чейин кыргызстандык балбандар 5 медаль багындырышкан — Акылбек Талантбек уулу күмүш медаль, Сыймык Махмудов, Раззак Бейшекеев, Мээрим Жуманазарова жана Айпери Медет кызы күмүш медалга ээ болушкан.
Айсулуу Тыныбекова — дүйнөнүн эки жолку, Азиянын төрт жолку чемпиону, Токиодогу Олимпиадалык оюндардын күмүш медалынын ээси жана башка көптөгөн мелдештердин жеңүүчүсү.
