Балбан Айпери Медет кызы Бишкекте өтүп жаткан Каба уулу Кожомкул & Раатбек Санатбаев аталышындагы дүйнөлүк рейтингдик мелдеште чемпион болду.
Медет кызы кыз-келиндер күрөшү боюнча 76 килограмм салмактык категорияда күч сынашты. Ал финалдык беттешке чейин Казакстан, Украина жана Кытайдан келген спортчуларды жеңди.
Ал эми финалда дагы бир кытайлык атаандашы Януан Хуанды 5:3 эсебинде утту.
Айпери Медет кызы — айымдар арасындагы күрөш боюнча Дүйнө чемпионатында коло медалдын ээси. Азия чемпионатынын чемпиону жана төрт жолку күмүш байгесинин жеңүүчүсү.
1-июнда башталган бул эл аралык турнир 4-июнга чейин уланат. Анда спортчулар грек-рим, эркин жана кыз-келиндер күрөшү боюнча ат салышууда. Мелдешке 20дан ашык өлкөдөн 500дөй спортчу катышууда. Алардын арасында олимпиаданын, дүйнөнүн бир нече чемпиондору бар.
Буга чейин аталган мелдеште кыз-келиндер күрөшү боюнча Мээрим Жуманазарова, ал эми грек-рим күрөшү боюнча Бексултан Назарбаев, Бексултан Махмудов жана Дастан Кадыровдор коло медаль тагынышкан.
