Кыргызстандын Тышкы иштер министрлигинен Орусиянын Иркутск облусунун Жигаловск районундагы Ковыктинск газоконденсант кенинде кыргызстандыктар менен тажикстандыктардын ортосунда массалык мушташ чыкканын билдиришти. ТИМдин маалыматына ылайык, окуя 23-июнда болгон.
Мекемеден мушташка 500дөн ашык адам катышканын билдиришти.
«Кыргызстандын беш жараны ар кандай оордуктагы жаракаттарды алып, алардын бири ооруканага жаткырылды. Бул окуя боюнча Орусиянын укук коргоо органдары тарабынан ыкчам-тергөө амалдары жүргүзүлүп жатат», — деп билдиришти министрликтен.
ТИМдин маалыматына ылайык, окуя болгон жерге кыргызстандыктарга жардам көрсөтүү үчүн кыргыз элчилигинин консулу жөнөп кеткен. Мекемеден маселе Кыргызстан менен Орусиянын элчилигинин көзөмөлүндө экенин белгилешти.
