Маданият министрлигинин кызматкерлери пландык текшерүүнүн жыйынтыгы менен «Телекөрсөтүү жана радиоуктуруу жөнүндөгү» мыйзамды бузганы үчүн «312 кино» жана «312 ТВ» телеканалдарына айып салышты. Бул тууралуу 9-августта мекеменин басма сөз кызматынан билдиришти.
Министрликтин маалыматына ылайык, телеканал аталган мыйзамдын 8-беренесинин 2-пунктунун 2-пунктчасынын ченемдерин сакташкан эмес.
«Бул пунктка ылайык, телерадио программалардын жана телерадио берүүлөрдүн 50 пайыздан кем эмеси ата мекендик өндүрүштөгү телерадио программалардан жана телерадио берүүлөрдөн турууга тийиш - анын ичинде саат 7.00дөн тартып 10.00гө чейин жана 18.00дөн тартып 23.00гө чейинки мезгилде», — деп билдиришти министрликтен.
Натыйжада телеканалдардын ар бирине 23 миң сомдон айып салынды.
Андан тышкары, пландык текшерүү дагы беш телеканалда жүргүзүлгөн: «312 Музыка», «НТС» (Жаша), «Кью спорт» (Q-Sport Arena), «Бакайнур-Мега» (Next TV) жана «Тумар ТВ». Бул телеканалдарда мыйзам бузуулар аныкталган эмес.
Автору: Медина Шамшидинова
