Кыргызстандык спортчу Аброр Хакимов Сауд Арабияда өтүп жаткан Бүткүл Дүйнөлүк оюндарында кикбокс боюнча алтын медаль жеңди. Бул тууралуу 29-октябрда Дене тарбия жана спорт департаментинен кабарлашты.
Хакимов 71 килограммга чейинки салмактык категорияда күч сынашып, финалда франциялык спортчуну 2:1 эсебинде утту.
Бүткүл дүйнөлүк оюндар 15 спорттун түрү боюнча Сауд Арабиянын борбору Эр-Рияд шаарында өтүп жатат. Мелдеш 20-октябрда башталган, 30-октябрда жыйынтыкталат.
Ага Кыргызстандын карате, самбо, джиу-джитсу, греплинг, казак күрөшү, алыш күрөшү жана кикбокс боюнча улуттук курамасы катышууда.
Аброр Хакимов өткөн жылы Бангок шаарында өткөн кикбокс боюнча Азия чемпионатында алтын байге уткан.
