Кыргызстандын дзюдо боюнча жаштар курама командасы Ташкентте өткөн Азия чемпионатында бир алтын, үч күмүш жана эки коло медаль жеңип, командалык эсепте 3-орунду ээледи.
Кыздар арасында 63 килограммга чейинки салмакта Адина Көчкөнбаева алтын медалга ээ болсо, Шахида Нурмухамедова (78 кг) менен Акмаржан Турдажиева (+78 кг) күмүш медаль тагынды.
Ошондой эле Жанар Жолдошева (57 кг) менен Сауле Алмазова (70 кг) коло байгени багындырды. Ал эми балдар арасында жалгыз — күмүш медалды Эмирхан Жолдошказиев (+100) алып келди.
18-19-ноябрда өткөн бул жолку жаштар арасындагы Азия чемпионатына 15 өлкөдөн келген 172 спортчу катышты.
Буга чейин 16-17-ноябрда болуп өткөн өспүрүмдөр арасындагы Азия биринчилигинде кыргыз курамасы бир алтын, бир күмүш жана үч коло медаль жеңген.
