Ишкерден 200 миң доллар пара алып жаткан жеринен кармалган президенттин Баткен облусундагы ыйгарым укуктуу өкүлүнүн кеңешчиси 2024-жылдын 21-январына чейин камалды. Бул тууралуу «Клоопко» 27-ноябрда облустук соттун басма сөз кызматы билдирди.
Маалыматка ылайык, Баткен райондук соту мындай чечимди 25-ноябрда чыгарды.
23-ноябрда президенттин Баткен облусундагы ыйгарым укуктуу өкүлүнүн кеңешчиси көмүр казуучу ишкананын башкы директорунан пара алып жаткан жеринен кармалган. Шектүүгө «Опузалап талап кылуу» беренесинин негизинде кылмыш иши козголгон.
Ал эми 24-ноябрда облус башчысы Абдикарим Алимбаев кеңешчисинин кармалганы тууралуу видео кайрылуу жарыялап, «окуяга тиешеси жок экенин жана кылмышка шектүү мыйзам алдында жооп бериши керектигин» айткан.
Атайын кызмат шектүүнүн аты-жөнүн ачыктаган жок. Бирок анын инициалы 2020-жылы Жогорку Кеңештин депутаттыгына «Мекенчил» партиясынын атынан ат салышып, учурда Баткен облусундагы ыйгарым укуктуу өкүлүнүн кеңешчиси болуп эмгектенген 37 жаштагы Талантбек Мамытовдун аты-жөнүнө дал келет.
ТЕМА БОЮНЧА:
УКМК: Президенттин Баткендеги өкүлүнүн кеңешчиси 200 миң доллар пара алууга шектелип кармалды
