Президент Садыр Жапаров «Кооперативдер жөнүндөгү» мыйзамга өзгөртүүлөрдү киргизүү боюнча долбоорго кол койду. Ага ылайык, турак жай кооперативдеринин ишине көзөмөл күчөтүлөт.
Президенттин басма сөз кызматынын маалыматына ылайык, мыйзам «турак жай-курулуш кооперативдерин натыйжалуу жана сарамжалдуу башкарууну камсыз кылууга, кооперативдерге кирүү менен тургундардын турак жай сатып алуудагы укуктарын ишке ашырууга» багытталган.
Мыйзам боюнча төмөнкү ченемдер киргизилүүдө:
- турак жай-курулуш кооперативдеринин ишин көзөмөлдөөчү орган, ошондой эле анын ыйгарым укуктары Министрлер Кабинети тарабынан аныкталат;
- өз ара жардамдашууга багытталган турак жай кооперативдери жашоо үчүн кыймылсыз мүлк сатып алуу боюнча биргелешкен ишти жүзөгө ашыруу үчүн гана түзүлөт. Иштин башка түрлɵрү каралбайт;
- турак жай кооперативинин мүчөсүнүн үлүштүк салымы кооперативдин үлүштүк фондуна акча түрүндө төлөнөт. Чыгымдарды жабуу же кооперативди камсыздоо үлүштүк фонддун эсебинен жүргүзүлбөйт;
- өзгөчө кырдаалдар үчүн фонд түзүлүшү керек, ансыз юстиция органдарына каттоодон өтүү мүмкүн эмес;
- кооперативдин иши тышкы аудитордук текшерүүгө алынышы мүмкүн;
- кандай гана кызыкдар тарап болбосун кооперативдин уставы менен таанышууга укуктуу.
«Азаттык» Юстиция министрлигине таянып, бүгүнкү күндө өлкөдө 162 коммерциялык эмес турак жай-курулуш кооперативи бар экенин жазган. Акыркы эки жылда мындай уюмдардын ишмердүүлүгүно байланыштуу 140 кылмыш иши козголгон.
2022-жылдын башында Улуттук банк турак жай кооперативдеринин ишмердүүлүгүндө каржы пирамидалардын белгилери бар экенин белгилеп, алданып калбоо үчүн тургундарды сак болууга жана бардык документтерин кылдат текшерүүгө чакырган.
ИИМдин маалыматы боюнча, 2022-жылы 1 524 кыргызстандык дээрлик 902 млн сом акчасын турак жай кооперативдерине алдаткан.
