Баткен облусунун Сүлүктү шаарында 14 жашар кызды зордуктоого шектүү катары 31 жаштагы тургун кармалды. Бул тууралуу «Клоопко» 16-январда облустук милициядан билдиришти.
Маалыматка караганда, 41 жаштагы тургун милицияга кайрылып, 14-январга караган түнү 14 жашар кызын 31 жаштагы киши зордуктаганын билдирген.
Бул боюнча «Зордуктоо» беренесинин негизинде кылмыш иши козголгон. Натыйжада, арыз ээси тарабынан көрсөтүлгөн шектүү — Сүлүктү шаарынын тургуну колго түшүрүлүп, убактылуу кармоочу жайга киргизилди.
Учурда териштирүү иштери уланып жатат.
Буга чейин, 9-январда да Жалал-Абад шаарындагы мейманканалардын биринде 14 жаштагы кызды зордуктоого 31 жаштагы киши шектелип жатканы белгилүү болгон.
Башкы прокуратуранын маалыматына ылайык, 2022-жылы өлкөдө балдарга карата зордук-зомбулук фактысы боюнча 438 кылмыш иши козголгон. Ошол эле кезде Ички иштер министри Улан Ниязбеков балдарга карата зомбулук фактылары жыл сайын өсүп жатканын айткан.
Президент Садыр Жапаров өткөн жылдын 12-августунда балдарга карата зомбулук үчүн жазаны күчөткөн мыйзамга кол койгон.
