Президент Садыр Жапаров Дональд Трампты АКШнын президенти болуп шайланышы менен куттуктады.
«Сиздин лидерлик тажрыйбаӊыз жана терең билимиӊиз Кыргызстан менен Америка Кошмо Штаттарынын ортосундагы өз ара урматтоо принциптерине негизделген ар тараптуу кызматташтыкты мындан ары да тереңдетүүгө мүмкүнчүлүк түзөт деп ишенем», — деп жазылган президенттин куттуктоосунда.
Жапаров өлкөлөр «ортодогу өнөктөштүктү жаңы деңгээлге көтөрө аларына» ишеним артарын билдирди. Ал «көп багыттуу кызматташтыкты өнүктүрүү үчүн өз тарабынан бардык күч-аракетин жумшай турганын» белгиледи.
Республикачы Дональд Трамп АКШдагы президенттик шайлоодо жеңишке жетти — ал шайлоочулар коллегиясынын 277синин колдоосуна ээ болду. Анын негизги атаандашы Камала Харрис зарыл болгон 270 добуштун 224үн гана алды.
