Укук коргоочу Камиль Рузиев Ысык-Көл облустук сотунун чечимин Жогорку сотко даттанды. Буга чейин облустук сот аны медициналык маалымкатты жасалмалоо иши боюнча күнөөлүү деп таап, 80 миң сом айып салган.
Мурдараак аталган иш боюнча Каракол шаардык соту кылмыштын курамы жок болгондуктан Рузиевди актаган, бирок облустук сот бул чечимди жокко чыгарган.
Рузиев өзү «медициналык маалымкатты жасалмалоо» иши атайын кызмат тарабынан «токулган» деп белгилеп келет.
Рузиевдин иши
Камиль Рузиев — «Вентус» укук коргоочу уюмунун жетекчиси. 2015-жылы аны милиция кызматкерлери кыйнап, «мындан ары Каракол ТИЗОнун ишин текшербейм, жабыркагандардын укугун коргобойм» деп тилкат жазып берүүнү талап кылышкан. Укук коргоочуну кыйноого алуу боюнча иш кыскартылган.
Рузиев 2018-жылы укук коргоо органынын кызматкерлери чет элдик жарандын чөнтөгүнө баңгизат салып койгону тууралуу коомчулукка айтып чыккан. Анда Бактияр Токушев аттуу тергөөчү чет элдикти кыйнап, күнөөнү мойнуна алдырганы тууралуу сөз болгон. Ушул окуядан кийин Рузиев тергөөчу тарабынан коркутууга кабылганын айткан.
Укук коргоочунун айтымында, тергөөчү Токушев анын өмүрүнө бир нече жолу коркунуч келтирген. Токушев Рузиевди курал менен коркутуп, башына табелдик тапанча такагандан кийин кызматынан алынган.
Токушев чет элдикти кыйнап, күнөөнү мойнуна алдырууга аракет кылганы үчүн дагы айыпталган — бул иш боюнча дагы жабырлануучунун кызыкчылыгын Рузиев коргогон.
Укук коргоочу УКМК жана прокуратурага арыз менен кайрылып, тергөөчүнүн коркутуулары менен кыйноолорун иликтөөнү талап кылган. Бирок укук коргоо органдары чара көрбөй койгон. Анда Рузиев УКМКнын кызматкерлеринин үстүнөн алардын аракетсиздигине даттанып доо арыз жазган.
Андан кийин эле Рузиев, 2020-жылдын 29-майында Каракол шаарында соттон чыгып келе жатканда кармалган. Аталган сотто Рузиевдин УКМКнын жана прокурорго карата доосу каралган болчу. Укук коргоочуну кармоонун үстүндө иштегендер Рузиев доо арыз жазган УКМКнын кызматкерлери менен түздөн-түз байланышта.
Ал эки суткага убактылуу кармоочу изоляторго киргизилген, ал эми УКМКдан ЖМКга укук коргоочу «Алдамчылыкка» жана дарыланганы тууралуу медициналык маалымкаттарды жасалмалоого шектелип жатканы айтылган пресс-релиз келген.
Укук коргоочу өзү деле дарыланганын жашырган эмес, мурдараак ага кол салуу болуп, ден-соолугу солгундай түшкөнүн айткан. Ал дарыланганы тууралуу маалыматтар амбулатордук картада бар экенин, ооруканада жатканы тууралуу маалыматкаттарды жасалмалабаганын билдирген.
Рузиевдин иши боюнча сот иши 2020-жылы 18-сентябрда башталган. Соттун башталышына жакын иштин материалынан «Алдамчылык» беренеси алып салынган.
2020-жылдын июнь айынын башында, укук коргоочу үй камагына чыгарылган соттон кийин УКМК мурда Рузиев кызыкчылыктарын коргогон үч кыргызстандыктын видеосун тараткан. Алар видеодо укук коргоочуну алдамчылыкта айыпташкан.
Видео чыгып кеткенден кийин андагы каармандардын бири укук коргоочуга карата эч кандай дооматы жоктугун айткан. Ал эми 2020-жылдын 28-июлунда Рузиевдин иши боюнча күбө катары өтүп жаткан адам Ысык-Көл облусунун ошол учурдагы башчысы Балбак Түлөбаевге арызданып кайрылган.
Ал УКМКнын кызматкерлери андан Рузиевге каршы «алдап» көрсөтмө алышканын билдирип, укук коргоочуга каршы кылмыш ишин токтотууну суранган.
