Өлкө башчысы Садыр Жапаров министрлер кабинетинин төрагасынын орун басары Эдил Байсаловго Мамлекеттик кызматтын 3-класстагы кеңешчиси чинин ыйгарды. Бул тууралуу 23-июнда министрлер кабинетинен билдиришти.
Маалыматка ылайык, Байсаловго жаңы чин мамлекеттик жана муниципалдык кызматкерлердин күнүнө карата берилген. Ага класстык чин ыйгаруу тууралуу күбөлүктү минкабдын төрагасы Акылбек Жапаров өзү тапшырды.
Класстык чин – административдик кызмат ордун ээлеген ар бир кызматкерге жекече ыйгарылуучу атайын наам.
Парламенттин 22-июндагы жыйынында депутаттар минкабдын төрагасынын орун басары Байсаловду кызматтан алуу сунушун президентке жөнөтүү боюнча токтом кабыл алышкан. «Ишеним» фракциясынын лидери, депутат Улукбек Ормонов «Байсаловдун билдирүүлөрү Жогорку Кеңештин ар-намысына жана кадыр-баркына шек келтирди» деп түшүндүргөн.
Байсалов өзү парламенттин чечимине комментарий бере элек.
Президентке Байсаловду кызматтан алууну депутаттар минкабдын өкүлү депутаттардын дарегине кезектеги жолу жагымсыз сөздөрдү айтып, 20-июнда парламент комитетинин жыйынында депутат Эмил Жамгырчиев менен кайым айтыша кеткенден кийин сунушташты.
