АКШ элчилиги президент Садыр Жапаровдун Кыргызстандагы көз карандысыз ЖМКлардын каржы булагы жөнүндөгү билдирүүсүнө жооп берди.
Дипломатиялык өкүлчүлүктөн көз карандысыз басылмалар жарандардын көйгөйлөрүнө натыйжалуу жооп берүү жана коррупция менен күрөшүүдө ар бир өкмөт үчүн маанилүү экенин белгилешти.
Билдирүүдө АКШ фактчекинг, кыргыз тилдүү журналистиканы колдоо жана мыйзам бузуулар менен коррупцияны ачкан иликтөөчү журналистикага жардам берүү боюнча программаларды каржылай турганы жазылган.
«АКШнын Кыргызстандагы элчилиги кыргыз өкмөтү жана жергиликтүү уюмдар менен өнөктөштүк аркылуу каржылык колдоо көрсөтүп келе жатканына сыймыктанат. (...) Биз жардам берүү программаларыбызды кыргыз өкмөтү менен кызматташтыкта ишке ашыруудабыз», — деп билдиришти элчиликтен.
Садыр Жапаров буга чейин Бишкекте өткөн үчүнчү Элдик курултайда сүйлөп жатып, АКШнын Мамдепартаментине каражатты көз карандысыз журналисттерге эмес, түздөн-түз мамлекетке берүүнү сунуштаган. Анын айтымында, акыркы күндөрү ЖМКлар «жалган маалыматтарды гана таратып, негатив издеп калды».
Мамлекет башчы бийлик ал каражатты натыйжалуу пайдаланып, өлкөдөгү журналистиканын деңгээлин көтөрүүнү жана сөз эркиндигинин камсыздалышын кепилдөөгө даяр экенин кошумчалаган.
