Маалымат саат 16:30да жаңыртылды
Фейсбуктун Талгат Абдракманов аттуу колдонуучусу 21-мартта өз баракчасына Жалал-Абад шаарынын аянтына Нооруз майрамын белгилөө үчүн чыгарылган мектеп окуучуларынын сүрөтүн жарыялады.
«Жалал-Абад шаарынын мэри өлкөдө болбогон сүмөлөк майрамын уюштурам деп, күндүн суугунда окуучуларды жалаң футболкачан калтыратып, үшүтүп, борбордук аянтка чыгарды», — деп жазган ал.
Сүрөттөн болжолдуу 5-6 класстын окуучулары жука кийингендиктен, үшүп-тоңуп турушканын көрүүгө болот. Ал эми аянтка келген башка көрүүчүлөр жылуу кийимчен экени байкалат.
Жалал-Абад шаардык мэриясынын маалымат борборунун башчысы Азамат Жээнбеков «Клоопко» майрамдык иш-чарага 6-7-класстын 100гө жакын окуучусу катышканын тастыктады.
«Биз шаардык билим берүү башкармалыгына байланышып “эмнеге чыгардынар” десек, Нооруз майрамына арналган иш-чарада тарбиялык маани болгондугу үчүн катыштырышканын айтты. Ал жерде окуучулар сырты кийимин бийлеген учурда гана 3-5 мүнөткө чечип турушкан», — деди Жээнбеков.
Бул бийлик өкүлдөрүнүн мектеп окуучуларын расмий иш-чараларга тартуу боюнча биринчи эле учуру эмес. Буга чейин 2018-жылдын сентябрында вице-премьер-министр Алтынай Өмүрбекова Кара-Суудагы мектептин ачылышына барган учурда жогорку мансаптагы конокторду күтүүдө күндүн ысыгынан улам айрым окуучулар өздөрүн начар сезишкен.
Андан көп өтпөй эле Өмүрбекова мектеп окуучуларынын расмий иш-чараларга тартылуусуна тыюу салам деп убада кылган.
Авторлошу: Айдай Беделбек кызы
