Кыргызстандын футбол федерациясынан (КРФФ) «Клоопко» кабарлашкандай, ышкыбозго байланыштуу окуядан улам уюмга штраф салынышы мүмкүн. Айыппулдун өлчөмүн Кыргызстан жана Мьянма курамаларынын ортосундагы матчка күбө болушкан ФИФАнын өкүлдөрү аныкташат.
«Бул жагдайда биз [ФИФА жөнөткөн] рапорттор боюнча чечимдерди жана бул ишти кароону гана күтүүгө аргасызбыз. Штрафтын так өлчөмү бизге белгисиз», — деп кабарлады Кыргызстандын футбол федерациясынын басма сөз катчысы.
КРФФга буга чейин матчтардын учурунда талаага ышкыбоздор чуркап чыга калышкандыгына байланыштуу айыппул салынган болчу. 2015-жылы ФИФА кыргыз федерациясына 28 миң доллар штраф салган.
«Анда [штраф] үч пункт коюлган — футбол талаасыначуркап чыга калган сүрөөнчү, [газонго] ыргытылган бөтөлкөлөр жана ашыкча толгон стадион», — деп түшүндүрүп беришти КРФФдан.
Федерациядан сүрөөчүнү айыпка жыга алышпашын жана ага кийинки оюндарды көрүүгө тыюу сала алышпашын кошумчалашты.
Кыргызстан менен Мьянманын курама командалары ортосундагы матч Бишкекте 10-октябрда кечинде болуп өттү. Оюн 7 — 0 эсебинде кыргыз футболчуларынын жеңиши менен аяктады. Белгисиз киши аянтчага оюндун аягында чуркап чыгып, Кыргызстан курамасынын дарбазачысын кучактаган. Андан кийин милиционерлерге колго түшүп берген.
