Ички иштер министри Кашкар Жунушалиев 30-апрелде парламенттин жыйынында коронавирус жуктуруп алган милиционерлерге компенсация төлөнүп берилээрин билдирди.
«Иликтөө жүргүзүлүп, жуктуруунун жагдайлары, жугуу жумушта же жумушта эмес болгону аныкталгандан кийин компенсация төлөнүп берилет. Компенсациянын өлчөмү уставда жазылган», — деди министр.
Саламаттык сактоо министрлиги 22-апрелде 12 милиция кызматкери коронавирус инфекциясын жуктуруп алганын билдирген.
Ошол эле кезде коронавирусту көбүнесе медиктер жуктурушууда. 30-апрелге карата 195 медкызматкерде COVID-19 диагнозу тастыкталган. Бүгүнкү күндө алардын 105и айыгып, ооруканадан чыгарылган.
Бийлик медиктерге да 200 миң сом компенсация төлөп берүүнү убада кылган, бирок иликтөө жүргүзүлгөн кийин гана.
Республика боюнча 30-апрелге карата жалпы 746 жуктуруу учуру катталган. Алардын ичинен 462 бейтап айыгып, ооруканадан чыгарылган. Ал эми пандемия башталгандан бери өлкөдө 8 адам каза тапкан.
