Ош шаардык төрөтканага 15 жаштагы кыз боюнан түшүп кайрылды. Бул тууралуу «Клоопко» Ош ШИИБинин басма сөз катчысы Абсаттар Тавакалов билдирди.
Маалыматка ылайык, жашы жете элек кыз апасы менен бейтапканага 6-декабрда барган. Өспүрүмдөн кан көп кетип, колунда түйүлдүк болгон. Бул окуя тууралуу шаардык төрөткананын дарыгерлери Оштун милициясына кабарлашкан.
«Ош шаарынын ички иштер башкармалыгынын ыкчам-тергөө тобу окуя болгон жерге барып,тийиштүү материлдарды чогултту. Азыркы учурда иликтөө иштери жүрүп жатат. Кыздын туугандары жана жакындары суралып жатат», — деди Тавакалов.
Ош ШИИБи бул окуя боюнча «Он алты жашка жетелек адам менен сексуалдык мүнөздөгү аракеттер» беренеси менен сотко чейинки өндүрүштү баштады.
Буга чейин Жалал-Абад облусундагы Сузак райондук соту 15 жаштагы карындашын зордуктаган тургунду 20 жылга эркинен ажыраткан. Жабырлануучу зордуктоодон кийин кош бойлуу болуп, шаардык төрөтканада көз жарган. Кийинчерээк өспүрүм кыз ымыркайынан баш тарткан.
