Исхак Раззаков атындагы Кыргыз мамлекеттик техникалык университетинде 16-декабрда ректорду шайлоо өттү. Окуу жайдын жетекчиси болуу үчүн жети талапкер ат салышкан:
- Абай Асиев, техника илимдеринин кандидаты, доцент;
- Жалалидин Галбаев, техника илимдеринин доктору, профессор;
- Турукмен Жабудаев, техника илимдеринин кандидаты, доцент;
- Таалайбек Маткеримов, техника илимдеринин доктору, профессор;
- Бекжан Төрөбеков, техника илимдеринин доктору, профессор;
- Анипа Усупкожоева, техника илимдеринин кандидаты, доцент;
- Мирлан Чыныбаев, физика-математика илимдеринин кандидаты, доцент.
Шайлоонун биринчи турунда бир да талапкер 50%дан жогору добуш ала албагандыктан экинчи тур өткөн. Экинчи турда Мирлан Чыныбаев жана Таалайбек Мааткеримов ат салышып, Чыныбаев жеңишке жетти.
Мирлан Чыныбаев Политехте 2003-жылдан тарта иштеп келет. Ал 2009-жылы Кыргыз-Герман техникалык факультетинин деканы, ал эми 2015-жылы университеттин илимий иштер жана тышкы байланыштар боюнча проректору болгон. Ал эми 2017-жылдан тарта Чыныбаев окуу иштери боюнча проректор кызматын аркалаган.
Кыргыз мамлекеттик техникалык университети 1954-жылы ачылган. Ошондон бери мамлекеттеги инженердик-техникалык багытта билим берген окуу жайлардын флагманы катары бааланып келет. Алтымыш жылдан ашуун убактан бери республикага, жакынкы жана алыскы чет өлкөлөргө ар кандай тармактар боюнча миңдеген жогорку квалификациялуу адистерди даярдоодо.
