Эсеп палатасынын жетекчисинин милдетин аткаруучу болуп Айжан Садыркулова дайындалды. Тийиштүү жарлыкка президент Садыр Жапаров кол койду. Буга чейинки төрага Улукбек Марипов премьер-министр болгондон кийин орду бош турган.
Садыркулова 2016-жылдан баштап Эсеп палатасынын аудитору болуп иштеп келет. Ага чейин Улуттук банкта жана «Партнер» юридикалык фирмасында адвокаттын жардамчысы болуп эмгектенген. Ал 1979-жылы 15-апрелде Бишкекте төрөлгөн. Кыргыз-Орус Славян университетинен юриспруденция адистиги боюнча билим алган. Кыргыз, орус, англис тилдерин билет.
Айжан Садыркулова 2009-жылы каза болгон президенттин аппаратынын экс-жетекчиси Медет Садыркуловдун кызы. Алгач укук коргоо органдары Садыркулов жол кырсыгынан каза тапканын айтышкан. Мүмкүн болгон унаа кырсыгынын күбөлөрүнүн бири — кырсыкка күнөөлүү деп табылган «Ауди» унаасынын айдоочусу 2010-жылдын апрелинде табышмактуу кырдаалда Бишкектин четинде өлтүрүлгөн.
Ал эми 2010-жылдагы революциядан кийин унаа кырсыгы мурдагы президент Курманбек Бакиевдин бир тууган иниси Жаныш Бакиевдин буйрутмасы менен атайын уюштурулганы айтылган.
2012-жылы Садыркуловдун өлүмүнө айыпталган жети кишинин бешөө 5 жылдан 18 жылга чейин эркинен ажыратылган — алардын ичинде күч органдарынын кызматкерлери жана уюшкан кылмыштуу топтун мүчөсү да бар. Калган эки айыпталуучу мунапыс менен жаза өтөөдөн бошотулган.
