16-апрелде Кыргызстанга 423 миң шприц жана аларды коопсуз утилизациялоо үчүн 3 825 атайын куту жеткирилди. Бул жөнүндө UNICEF эл аралык уюмунун басма сөз кызматы билдирди.
Шприцтер жана утилизация кутулары COVAX программасы боюнча биринчи партия катары келген.
«Бул демилге [COVAX] өндүрүүчүлөр жана өнөктөштөр менен COVID-19 дартына каршы вакциналарды сатып алуу, жеткирүү, логистика жана сактоо боюнча иш алып барат», — деп белгиледи UNICEF.
Келген медициналык каражаттар UNICEF тарабынан Саламаттык сактоо жана социалдык өнүктүрүү министрлигине өткөрүлдү.
Калкты коронавируска каршы эмдөөнүн биринчи этабы 29-мартта башталган. Азыркы учурда COVID-19 илдетине каршы кытайлык Sinopharm вакцинасы гана сайылууда, ал үстүбүздөгү жылдын 19-мартында өлкөгө алынып келген. Биринчи этапта медицина, билим берүү, укук коргоо жана күч түзүмдөрүнүн кызматкерлерин эмдөөдөн өткөрүү пландалууда.
Саламаттык сактоо министрлигинин маалыматы боюнча, Sinopharm вакцинасы 75 миң кишиге жетет.
