Бишкек шаарынын мэринин милдетин аткаруучу болуп Айбек Жунушалиев дайындалды. Ал буга чейин министрлер кабинетинин төрагасынын биринчи орун басары болчу. Тиешелүү буйрукка Улукбек Марипов 12-августта кол койду.
«Айбек Жунушалиев Бишкек шаарынын жаңы мэри шайланганга чейин калаа башчысынын милдетин аткаруучу болуп дайындалды», — деп жазылат министрлер кабинетинин билдирүүсүндө.
Ал эми мэрди Бишкек шаардык кеңештин депутаттары 26-августта шайлашы керек.
Буга чейин Бишкек шаарынын мэринин м.а. жаткан Таалайбек Сарыбашов 12-августта өз каалоосу менен кызматынан кеткен. Сарыбашов кызматтан кетип жатканында «эч кандай саясат» жоктугун белгилеген. Ал бул кызматты болгону он күн аркалады.
Айбек Жунушалиев деген ким?
Айбек Жунушалиев — 1976-жылы 6-июлда Чүй облусунун Кегети айылында туулган. 1999 -жылы Ж.Баласагын атындагы КУУда юриспруденция адистигин аяктаган. Эмгек жолун ошол эле университетте 2000–жылдары окутуучу болуп баштаган.
Жунушалиев 2021-жылга чейин бир топ мамлекеттик кызматтарды аркалаган. 2010–2014–жылдары өкмөттүн Чүй облусундагы ыйгарым укуктуу өкүлүнүн аппарат жетекчиси, 2015-жылы Эмгек, миграция жана жаштар саясаты министрлигинин статс-катчысы болгон.
2021-жылдын февралында ал министрлер кабинетинин аппарат жетекчисинин биринчи орун басары болуп иштеген. Ал эми май айында Артём Новиковдун ордуна министрлер кабинетинин төрагасынын биринчи орун басары болуп дайындалган.
Тема боюнча:
